Loading...

ავიცრათ ერთმანეთისთვის!

#ვაქცინაგვიცავს

სულ ჩატარდა 2 145 233 აცრა

Loading...
ოფიციალური გვერდები

ხშირად დასმული კითხვები

17 ნოემბრიდან საქართველო ციფრული კოვიდ-პასპორტების ერთიან სივრცეს შეურთდა (EU Gateway-ის ქვეყნები).  რაც იმას ნიშნავს, რომ საქართველოს მიერ გაცემული კოვიდ-სერტიფიკატები ვაქცინაციის, ინფექციის გადატანის და PCR ტესტირების შესახებ, აღნიშნულ ერთიან სივრცეში ჩაერთვება. 


Georgia e-Health-ის აპლიკაცია ხელმისაწვდომია როგორც App store-ში, ისე Google store-ზეც.  აპლიკაციის გადმოწერის შემდეგ მოქალაქემ უნდა გაიროს მარტივი რეგისტრაცია და ვაქცინაციასთან დაკავშირებული ყველა ინფორმაცია ავტომატურად აისახება. პროგრამაში გამოჩნდება პჯრ ტესტირებისა და კოვიდ-ინფექციის გადატანის შესახებ ინფორმაციაც. 


აპლიკაციის მეშვეობით, რომელზეც მოქალაქის QR კოდები აისახება, შესაძლებელია მწვანე  სტატუსის დადასტურება. 


“მწვანე პასპორტით” სარგებლობა საჭირო იქნება შემდეგ დაწესებულებებში:
• კვების ობიექტები;
• რესტორნები, კაფეები და ბარების ღია და დახურულ სივრცეები;
• გასართობი ცენტრები;
• კინოთეატრები, თეატრები, ოპერა და მუზეუმები;
• საკონცერტო დარბაზები;
• სამორინეები და სათამაშო ბიზნეს ობიექტები;
• სპა-ცენტრები;
• ფიტნეს-დარბაზები;
• სასტუმროები;
• სამთო კურორტების საბაგირო გზები.

 

- საზოგადოებრივ ტრანსპორტში და მაღაზიებში ”მწვანე პასპორტი” სავალდებულო არ იქნება.
რაც შეეხება საბავშვო-გასართობ ცენტრებს, „მწვანე პასპორტის“ მოთხოვნა იმოქმედებს მხოლოდ 18 წლის ასაკს ზემოთ მოქალაქეებისთვის.

- მათთვის ვინც ვერ შეძლებს აპლიკაციის გამოყენებას, იუსტიციის სახლი გასცემს დოკუმენტს სრულად ვაქცინაციის შესახებ, ხოლო ტესტებზე ინფორმაციის გამოთხოვნა შესაძლებელი იქნება შესაბამისი ლაბორატორიიდან.

- მნიშვნელოვანია, რომ მიმდინარეობს ევროკავშირის ბაზებთან სინქრონიზაციის პროცესიც და უახლოეს მომავალში მასთან დაკავშირებით დამატებით ინფორმაცია გახდება ცნობილი.

- 18 წლამდე ასაკის პირებს განსაზღვრულ ობიექტებზე, არ აქვთ ”მწვანე პასპორტის” წარდგენის ვალდებულება, გარდა საზღვარგარეთ მოგზაურობისა, სადაც მშობლებს საშუალება ექნებათ გააზიარონ შვილების სტატუსზე ინფორმაცია და ქონდეთ წვდომა მათ მონაცემებზე.


გადმოწერე აპლიკაცია 


iPhone https://apps.apple.com/us/app/georgia-e-health/id1590322048 


Android https://play.google.com/store/apps/details?id=com.moh.geehealth

 

60 წლის და უფროსი ასაკის საქართველოს მოქალაქე, რომელიც 2021 წლის 31 დეკემბრის ჩათვლით, ჩაიტარებს ვაქცინაციას კორონავირუსის საწინააღმდეგო ვაქცინის პირველი დოზით, ავტომატურად მიიღებს 200 ლარიან ერთჯერად დანამატს.

სოციალური მომსახურების სააგენტოს ვაქცინირებულ პირთა შესახებ ინფორმაცია თვის განმავლობაში ორჯერ (1-ელ და 15 რიცხვებში) მიეწოდება და ინფორმაციის მიღებიდან მომდევნო 5 სამუშაო დღის ვადაში უზრუნველყოფს  მოქალაქისთვის თანხის ჩარიცხვას.

ერთჯერადი დანამატის ჩარიცხვა „ლიბერთი ბანკთან“ გაფორმებული ხელშეკრულების ფარგლებში, მათსავე ანგარიშზე მოხდება.

რაც შეეხება იმ მოქალაქეებს, რომელთა ასაკი 60-დან 65 წლამდეა და საპენსიო ასაკს არ მიეკუთვნებიან, სოციალური მომსახურების სააგენტო „ლიბერთი ბანკთან“ არსებული ხელშეკრულების ფარგლებში, ანგარიშებს თავად გაუხსნის.

ის მოქალაქეები, რომლებიც აცრის პირველ დოზას 2021 წლის დეკემბრის თვის ბოლოს გაიკეთებენ, ერთჯერად დანამატს  2022 წელს მიიღებენ.

საქართველოში, ისევე, როგორც მთელს მსოფლიოში, ეპიდემიოლოგიური ვითარების გაუარესების ტენდენციის ანალიზის საფუძველზე, უწყებათაშორისმა საკოორდინაციო საბჭომ შეზღუდვების დაწესების გადაწყვეტილება მიიღო. 

სხდომაზე, რომელიც პრემიერ-მინისტრ ირაკლი ღარიბაშვილის ხელმძღვანელობით მთავრობის ადმინისტრაციაში გაიმართა, აღინიშნა, რომ ისევე, როგორც მთელს მსოფლიოში, საქართველოშიც ეპიდემიოლოგიური ვითარება რთულია, ძირითადად ახალი შტამების (დელტა შტამი) ფართო ცირკულაციის გამო. ეპიდემიოლოგიური მაჩვენებლების და ტენდენციების ანალიზის საფუძველზე, საკოორდინაციო საბჭომ, აგვისტოში იმუნიზაციის პროცესის ინტენსიფიცირების მიუხედავად, საჭიროდ მიიჩნია ე.წ არაფარმაცევტული ინტერვენციების განხორციელება. 

საკოორდინაციო საბჭოს გადაწყვეტილებით მოქმედებს შემდეგი შეზღუდვები:

• 1-ლი დეკემბრიდან ამოქმედდება ე.წ „მწვანე პასპორტის“ კონცეფცია. პირს მწვანე სტატუსი აქვს, თუ იგი ვაქცინირებულია სრულად, ჩატარებული აქვს 72-საათიანი ვალიდურობის PCR-ტესტი ან 24-საათიანი ვალიდურობის ანტიგენ-ტესტი, ან გადატანილი აქვს კორონავირუსი. „მწვანე პასპორტის“ მოთხოვნა იმოქმედებს 18 წლის ასაკის ზემოთ მოქალაქეებისთვის.

საკოორდინაციო საბჭოს გადაწყვეტილებით, 1-ლი დეკემბრიდან მოქალაქეები მხოლოდ და მხოლოდ „მწვანე პასპორტის“ პრინციპით შეძლებენ შესვლას: კვების ობიექტების, რესტორნების, კაფეების და ბარების ღია და დახურულ სივრცეებში, კინოთეატრებში, თეატრებში, ოპერაში, მუზეუმებში, საკონცერტო დარბაზებში, გასართობ ცენტრებში, სამორინეებსა და სათამაშო ბიზნესის ობიექტებზე, სპა-ცენტრებში, ფიტნეს-დარბაზებში, სასტუმროებში და ასევე სამთო კურორტების - საბაგირო გზებზე; აღნიშნული მოთხოვნა გავრცელდება ჩამოთვლილი ობიექტების სტუმრებზე. რაც შეეხება საბავშვო-გასართობ ცენტრებს, „მწვანე პასპორტის“ მოთხოვნა იმოქმედებს მხოლოდ 18 წლის ასაკს ზემოთ მოქალაქეებისთვის.

• საქართველოს მოქალაქეები, რომლებიც საქართველოში არიან ვაქცინირებული და ქვეყანაში შემოდიან სახმელეთო საზღვრით, „პისიარ“ ტესტის წარდგენის ვალდებულებისგან თავისუფლდებიან.

• პირველი დეკემბრიდან კინოთეატრებსა და თეატრებში მაყურებელთა რაოდენობა 30-დან 50 პროცენტამდე გაიზრდება. 

• პირველი დეკემბრიდან რესტორნების მუშაობაზე საათობრივი შეზღუდვა იხსნება.

• სტუდენტები, რომლებიც მედიცინის საგანმანათლებლო პროგრამების პრაქტიკულ ნაწილს გადიან არადისტანციურად, მოეთხოვებათ, წარადგინონ ვაქცინაციის დამადასტურებელი ცნობა ან კვირაში ერთხელ საკუთარი ხარჯით ჩატარებული PCR ტესტის უარყოფითი პასუხი ან 6 თვის მანძილზე კორონავირუსის გადატანის დამადასტურებელი ცნობა. 

ასევე, იკრძალება ბანაკის ტიპის შეკრებები, მათი ორგანიზაციული ფორმისა და ჩატარების ადგილის მიუხედავად;

• სრულად იზღუდება ნებისმიერი ტიპის გასართობი, სახელოვნებო, საფესტივალო და კულტურული (გარდა სათეატრო და კინემატოგრაფიული ხასიათისა) ღონისძიება. გათვალისწინებული შეზღუდვა არ ვრცელდება სასტუმროს ტერიტორიაზე კონცერტის ჩატარებაზე. ხოლო, სხვადასხვა სპორტული შეჯიბრებების გამართვა შესაძლებელი იქნება მაყურებლის გარეშე, თუმცა ყველა მონაწილე უნდა იყოს ვაქცინირებული (მეორე დოზიდან გასული უნდა იყოს 14 დღე) ან უნდა ჰქონდეს ბოლო 72 საათში ჩატარებული PCR ტესტის ან ბოლო 24 საათის განმავლობაში ჩატარებული ანტიგენის ტესტის ნეგატიური პასუხი.

• საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართავს საბჭო კერძო დამსაქმებლებს;

• 4 ოქტომბრიდან სასწავლო პროცესი განახლდა საკლასო ოთახებსა და აუდიტორიებში​, აღდგა სააღმზრდელო დაწესებულებების მუშაობაც. პირბადის ტარება სავალდებულო გახდა ყველა მოსწავლისთვის. ასევე, მუშაობას აახლებენ ბავშვთა გასართობი ცენტრები;

• ვაქცინაციის მაქსიმალურად გაფართოებისა და ხელმისაწვდომობის გაზრდის მიზნით, აცრების პროცესში ჩაერთვებიან სამხედრო ექიმებისგან დაკომპლექტებული ბრიგადები; 

• ჯანდაცვის უწყება განაგრძობს მუშაობას დამატებითი საწოლების მობილიზების მიმართულებით;

• მაქსიმალურად გამკაცრდება კონტროლი მოქმედი რეგულაციების აღსრულებაზე, მათ შორის ისეთი სოციალური ღონისძიებების გამართვაზე, როგორიცაა ქორწილი, ქელეხი და ა.შ. მსგავსი ღონისძიებების მასპინძლობისთვის, ობიექტები ჯარიმდებიან 10 ათასი ლარით, ხოლო განმეორებით დარღვევისას - ექვემდებარებიან დალუქვას.

ვაქცინაცია სწორი არჩევანია COVID-19-სგან საკუთარი თავის, ოჯახისა და საზოგადოების დასაცავად. ვაქცინაცია ამცირებს დაინფიცირების, მძიმე ავადობისა და სიკვდილობის რისკებს და პანდემიის შეჩერების ერთ-ერთი ყველაზე ეფექტიანი საშუალებაა.

ვაქცინაცია რეკომენდებულია იმ შემთხვევაშიც, თუ COVID-19 უკვე გადაიტანეთ, რადგან არსებული მტკიცებულებებით, ინფექციის გადატანის შემდეგ შესაძლოა არ ჩამოყალიბდეს სათანადო იმუნური პასუხი და ადამიანი კვლავ რჩება განმეორებითი ინფიცირების რისკის ქვეშ.

პანდემიის შესაჩერებლად, COVID-19-ის საწინააღმდეგო ვაქცინაციის პარალელურად, აუცილებელია პრევენციული ღონისძიებების გაგრძელება - ნიღბის ტარება, სულ მცირე ერთმეტრიანი დისტანციისა და ხელის ჰიგიენის დაცვა.

COVID-19-ის საწინააღმდეგო ვაქცინები რეკორდულად მცირე დროში შექმნილი უპრეცედენტო ურთიერთთანამშრომლობისა და დიდი ინვესტიციების შედეგია, და ისინი სრულად შეესაბამება უსაფრთხოების ყველა სტანდარტს.

COVID-19-ის საწინააღმდეგო ვაქცინების გამოყენება ხდება მხოლოდ კლინიკური კვლევების საფუძვლიანი შესწავლისა და ანალიზის შემდეგ.

ადამიანების გარკვეულ ნაწილს შეიძლება ჰქონდეს ალერგიული რეაქცია სხვადასხვა  ალერგენზე - მაგ., პენიცილინზე ან მიწის თხილზე (არაქისი), კრაზანის ნაკბენზე და ა.შ., ასევე ალერგიული რეაქცია შესაძლებელია განვითარდეს COVID-19-ის საწინააღმდეგო  ვაქცინებზეც.

ჯანმრთელობის მსოფლიო ორგანიზაციის რეკომენდაციის შესაბამისად,  ექიმი დეტალურად აფასებს პაციენტის ანამნეზს იმის დასადგენად, აქვს თუ არა პაციენტს COVID-19-ის საწინააღმდეგო ვაქცინაზე მძიმე ალერგიული რეაქციის რისკი. იმუნიზაციის პროვაიდერი კლინიკის სამედიცინო პერსონალი სათანადოდაა მომზადებული, რომ დროულად ამოიცნონ მძიმე ალერგიული რეაქციები და მიიღონ გადაუდებელი ზომები ასეთი რეაქციების სამკურნალოდ. 

ამიტომ, მნიშვნელოვანია ექიმს სრულყოფილად მიაწოდოთ ინფორმაცია იმის შესახებ, გქონდათ თუ არა ადრე რამეზე მწვავე ალერგიული რეაქცია, განსაკუთრებით მაშინ, თუ მდგომარეობა ადრენალინის/ეპინეფრინის გამოყენებას ან ჰოსპიტალიზაციას მოითხოვდა. 

მძიმე მწვავე ალერგიული რეაქციები (ანაფილაქსია) აცრების შემდეგ, ძირითადად, იშვიათად და მყისიერად ვითარდება და შესაბამისად მომზადებულ სამედიცინო პერსონალს მისი მართვა კარგად შეუძლია. 

სამედიცინო დაწესებულების დატოვების შემდეგ, თუ თავს შეუძლოდ იგრძნობთ და ფიქრობთ, რომ შესაძლებელია მოგვიანებითი ალერგიული რეაქცია გქონდეთ, დაუყოვნებლივ დაუკავშირდით ექიმს.

პფაიზერ-ბიონტექის მ-რნმ ვაქცინა (Pfizer-BionTech)

  • 12 წელზე უმცროსი ასაკი;
  • ცნობილი მძიმე ალერგიული რეაქცია ვაქცინის ნებისმიერ კომპონენტზე განსაკუთრებით პოლიეთილენგლიკოლზე (PEG) ან მონათესავე მოლეკულებზე;
  • ანაფილაქსიური რეაქცია ვაქცინის პირველ დოზაზე. აღნიშნულ შემთხვევაში ვაქცინის მეორე დოზა არ კეთდება;
  • ცხელებით მიმდინარე (38,5°C -ზე მეტი)  მძიმე მწვავე დაავადება - ვაქცინაცია უნდა გადაიდოს გამოჯანმრთელებამდე.
  • COVID-19-ის  ინფექციის დიაგნოზის დასმიდან 1 თვე (30 დღე); გამონაკლისს წარმოადგენენ პირები, რომლებიც COVID - 19 ინფექციის დროს მკურნალობდნენ კონვალესცენტური პლაზმით და პირები, რომლთაც მწვავე პერიოდში ჰქონდათ მულტისისტემური ანთებითი სინდრომი. (მინიმალური ინტერვალია 120 დღე). 
  • COVID-19-ის  გადატანილ პირებში მონოკლონური ანტისხეულებით ან რეკონვალესცენტის პლაზმით ჩატარებული მკურნალობა - ვაქცინაცია უნდა გადაიდოს მკურნალობის დასრულებიდან სულ ცოტა 90 დღით, მკურნალობისა და ვაქცინით გამოწვეული იმუნური პასუხების ინტერფერენციის თავიდან არიდების მიზნით;
  • ნებისმიერ სხვა აცრასა  და COVID-19-ის საწინააღმდეგო ვაქცინით აცრას შორის მინიმალური ინტერვალი შეადგენს 14 დღეს. გამონაკლისია ცოფის და ტეტანუსის საწინააღმდეგო პროფილაქტიკა, რომელიც ტარდება ინტერვალის დაცვის გარეშე.  

 

ასტრაზენეკას ვექტორული ვაქცინა (AstraZeneca)

  • 45 წელზე უმცროსი ასაკი;
  • ჰიპერმგრძნობელობა ვაქცინის აქტიურ ნივთიერებაზე ან დანამატზე;
  • ანაფილაქსიური რეაქცია ვაქცინის პირველ დოზაზე. აღნიშნულ შემთხვევაში ვაქცინის მეორე დოზა არ კეთდება;
  • ჰეპარინ-ინდუცირებული თრომბოციტოპენია (HITT ან HIT type 2);
  • გავრცობილი ვენური და/ან არტერიული თრომბოზი თრომბოციტოპენიის ფონზე, რომელიც განვითარებული იყო  COVID-19-ის  ნებისმიერი ვაქცინით იმუნიზაციის შემდეგ, ასტრაზენეკას ვაქცინით მეორე დოზა არ კეთდება;
  • ცხელებით მიმდინარე (38,5°C -ზე მეტი)  მძიმე მწვავე დაავადება - ვაქცინაცია უნდა გადაიდოს გამოჯანმრთელებამდე.
  • COVID-19-ის  ინფექციის დიაგნოზის დასმიდან 1 თვე (30 დღე); გამონაკლისს წარმოადგენენ პირები, რომლებიც COVID - 19 ინფექციის დროს მკურნალობდნენ კონვალესცენტური პლაზმით და პირები, რომლთაც მწვავე პერიოდში ჰქონდათ მულტისისტემური ანთებითი სინდრომი. (მინიმალური ინტერვალია 120 დღე);
  • ნებისმიერ სხვა აცრასა  და COVID-19-ის საწინააღმდეგო ვაქცინით აცრას შორის მინიმალური ინტერვალი შეადგენს 14 დღეს; გამონაკლისია ცოფის და ტეტანუსის საწინააღმდეგო პროფილაქტიკა, რომელიც ტარდება ინტერვალის დაცვის გარეშე;
  • კაპილარული  გაჟონვის სინდრომის - CLS მქონე პირებში.

 

სინოფარმის ინაქტივირებული ვაქცინა (Sinopharm)

  • 18 წელზე უმცროსი ასაკი;
  • ალერგიული რეაქცია ვაქცინის აქტიურ ნივთიერებაზე ან დანამატზე;
  • ანაფილაქსიური რეაქცია ვაქცინის პირველ დოზაზე. აღნიშნულ შემთხვევაში ვაქცინის მეორე დოზა არ კეთდება. ასევე, აცრა არ კეთდება, თუ პირველი დოზის მიღების შემდეგ დაფიქსირდა არასასურველი რეაქცია ნერვული სისტემის მხრიდან;
  • ალერგიული რეაქცია ნებისმიერ ადრე მიღებულ ვაქცინაზე (მწვავე ალერგიული რეაქცია, ანგიონევროზული შეშუპება, სუნთქვის გაძნელება და სხვა);
  • არაკონტროლირებადი ეპილეფსია ან სხვა პროგრესირებადი ნევროლოგიური დაავადება და ისტორიაში გიენ-ბარეს სინდრომი;
  • სერიოზული ქრონიკული დაავადების ტერმინალური სტადია ან ზოგიერთი ქრონიკული დაავადება, რომელიც შეიძლება სიცოცხლისთვის სახიფათო გახდეს ნებისმიერ დროს;
  • ორსულობა;
  • ძუძუთი კვება;
  • ცხელებით მიმდინარე (38,5°C -ზე მეტი)  მძიმე მწვავე დაავადება - ვაქცინაცია უნდა გადაიდოს გამოჯანმრთელებამდე;
  • COVID-19-ის  ინფექციის დიაგნოზის დასმიდან 1 თვე (30 დღე); გამონაკლისს წარმოადგენენ პირები, რომლებიც COVID - 19 ინფექციის დროს მკურნალობდნენ კონვალესცენტური პლაზმით და პირები, რომლთაც მწვავე პერიოდში ჰქონდათ მულტისისტემური ანთებითი სინდრომი. (მინიმალური ინტერვალია 120 დღე);
  • იმუნოგლობულინის მიღების შემდეგ COVID – 19-ის საწინააღმდეგო  აცრა ტარდება 1 თვის ინტერვალით;
  • ნებისმიერ სხვა აცრასა  და COVID-19-ის საწინააღმდეგო ვაქცინით აცრას შორის მინიმალური ინტერვალი შეადგენს 14 დღეს; გამონაკლისია ცოფის და ტეტანუსის საწინააღმდეგო  პროფილაქტიკა, რომელიც ტარდება ინტერვალის დაცვის გარეშე.  

 

სინოვაკის ინაქტივირებული ვაქცინა (Sinovac)

  • 18 წელზე უმცროსი ასაკი;
  • ალერგიული რეაქცია ვაქცინის რომელიმე კომპონენტის მიმართ;
  • ანაფილაქსიური რეაქცია ვაქცინის პირველ დოზაზე. აღნიშნულ შემთხვევაში ვაქცინის მეორე დოზა არ კეთდება;
  • ორსულობა;
  • ძუძუთი კვება;
  • ცხელებით მიმდინარე (38,5°C -ზე მეტი) მძიმე მწვავე დაავადება; ქრონიკული დაავადების გამწვავება;
  • COVID-19-ის  ინფექციის დიაგნოზის დასმიდან 1 თვე (30 დღე); გამონაკლისს წარმოადგენენ პირები, რომლებიც COVID - 19 ინფექციის დროს მკურნალობდნენ კონვალესცენტური პლაზმით და პირები, რომლთაც მწვავე პერიოდში ჰქონდათ მულტისისტემური ანთებითი სინდრომი. (მინიმალური ინტერვალია 120 დღე);
  • იმუნოგლობულინის მიღების შემდეგ COVID – 19-ის საწინააღმდეგო  აცრა ტარდება 1 თვის ინტერვალით;
  • ნებისმიერ სხვა აცრასა  და COVID-19-ის საწინააღმდეგო ვაქცინით აცრას შორის მინიმალური ინტერვალი შეადგენს 14 დღეს.  გამონაკლისია ცოფის საწინააღმდეგო (ანტირაბიული) და ტეტანუსის საწინააღმდეგო პროფილაქტიკა, რომელიც ტარდება ინტერვალის დაცვის გარეშე.

 

COVID-19-ის საწინააღმდეგო ვაქცინაციის ძირითადი მიზანია შეამციროს ვირუსით გამოწვეული ავადობა, ჰოსპიტალიზაცია და სიკვდილობა, რაც დასტურდება კვლევებით.  ჯანმრთელობის მსოფლიო ორგანიზაციის მიერ ავტორიზებული და საქართველოში გამოყენებული COVID-19-ის საწინააღმდეგო ვაქცინები - პფაიზერ-ბიონტექი, ოქსფორდ ასტრაზენეკა,  სინოფარმი და სინოვაკი თითქმის 100%-ით იცავენ ადამიანს COVID-19-ის დაავადების მძიმე ფორმის, ჰოსპიტალიზაციისა და სიკვდილისაგან. რაც შეეხება დაავადების სიმპტომური ფორმით გამოვლინების პრევენციას, ის ყველა ვაქცინისთვის ინდივიდუალურია და ემყარება III ფაზის კვლევებს, რაც აღწერილია თითოეული ვაქცინის ანოტაციაში. სხვადასხვა ვაქცინის ეფექტიანობის მაჩვენებელი კლინიკური კვლევებისა  და ვაქცინაციის დანერგვის მონაცემების  მიხედვით  50% - 95% -მდე მერყეობს. 

ასევე, მსოფლიოს მასშტაბით მატულობს მტკიცებულება იმის შესახებ, რომ COVID-19-ის საწინააღმდეგო  ვაქცინები იცავს არა მარტო  ინფიცირებისგან, დაავადების მძიმე ფორმის განვითარების, ჰოსპიტალიზაციისა და სიკვდილისაგან, არამედ ისინი ასევე მნიშვნელოვნად ამცირებენ ვირუსის სხვა ადამიანებზე გადაცემის შანსს.

როგორც COVID-19, ისე COVID-19-ის საწინააღმდეგო ვაქცინაც ახალია. შესაბამისად, ჯანდაცვის ექსპერტებმა ამ ეტაპზე ზუსტად არ იციან რამდენი ხნის განმავლობაშია დაცული ადამიანი ინფექციის გადატანის ან ვაქცინაციის შემდეგ; მეორე მხრივ, კარგადაა ცნობილი, რომ COVID-19-მა მსოფლიოში უამრავი გართულება და სიკვდილი გამოიწვია.

ვაქცინაცია ყველაზე უსაფრთხო არჩევანია!

 

ვაქცინაციას შესაძლოა ახლდეს გვერდითი მოვლენები, რაც ნორმალურია და მიანიშნებს, რომ თქვენი ორგანიზმი გამოიმუშავებს იმუნიტეტს.

COVID-19-ის საწინააღმდეგო ვაქცინის პირველი ან მეორე დოზის მიღებას შესაძლოა თან ახლდეს შემდეგი გვერდითი მოვლენები: ადგილობრივი რეაქცია (ტკივილი, შეშუპება, შეწითლება ინექციის ადგილზე), დაღლილობა,შეუძლოდ ყოფნა, თავის ტკივილი, კუნთების ტკივილი, შემცივნება, სახსრების ტკივილი, ცხელება, გულისრევა, ლიმფური ჯირკვლების შეშუპება (ლიმფადენოპათია).

COVID-19-ის საწინააღმდეგო ვაქცინამ, ისევე როგორც ნებისმიერმა სხვა ვაქცინამ ან მედიკამენტმა, შესაძლოა, გარკვეული გვერდითი მოვლენები გამოიწვიოს. თუმცა, ეს მოვლენები ზოგადად მსუბუქი და დროებითია და ხშირ შემთხვევაში ვაქცინაციიდან სამი დღის განმავლობაში იჩენს თავს. თუმცა, თუ სიმპტომები გაგიგრძელდათ და თავს შეუძლოდ იგრძნობთ, დაუყოვნებლივ დაუკავშირდით ოჯახის ექიმს ან დარეკეთ 1522-ზე.

დამატებითი ინფორმაციისთვის ეწვიეთ ვებგვერდს: ncdc.ge

COVID-19-ის ინფექციის გადატანის მიუხედავად, ვაქცინაციის ჩატარება რეკომენდებულია, ვინაიდან ამ ეტაპზე მეცნიერებისათვის უცნობია დაავადების გადატანიდან რა პერიოდით ნარჩუნდება ბუნებრივი იმუნიტეტი.

კლინიკური კვლევების მონაცემები მიუთითებს, რომ ამჟამად ავტორიზებული COVID-19-ის საწინააღმდეგო ვაქცინების გამოყენება უსაფრთხოა მათთვის, ვინც უკვე გადაიტანა COVID-19-ის ინფექცია. ვაქცინაციის შეთავაზება ხდება მიუხედავად იმისა, დაავადება იყო სიმპტომური თუ უსიმპტომო. ვაქცინაციის ჩატარების შესახებ გადაწყვეტილების მისაღებად არ არის აუცილებელი ვირუსზე ტესტირება მწვავე ინფექციის დიაგნოსტიკის ან სეროლოგიური გამოკვლევა გადატანილი ინფექციის დადგენის მიზნით.

საზოგადოებაში დაავადების გავრცელების პრევენციის მიზნით, რეკომენდებულია COVID-19-ის დადასტურებული ინფექციის მქონე პაციენტებში ვაქცინაცია გადაიდოს მანამ, სანამ ადამიანი არ გამოჯანმრთელდება მწვავე დაავადებისაგან (თუ ადამიანს ჰქონდა სიმპტომები) და არ დაკმაყოფილდება იზოლირების შეწყვეტის კრიტერიუმები. აღნიშნული რეკომენდაცია ვრცელდება იმ პაციენტებზე, რომელთაც ინფექცია დაუდასტურდათ ვაქცინის პირველი დოზის მიღებამდე ან ვაქცინის პირველ და მეორე დოზის შორის პერიოდში.

მიუხედავად იმისა, რომ ინფექციასა და ვაქცინაციას შორის არ არის რეკომენდებული მინიმალური ინტერვალი, ამჟამინდელი მტკიცებულებები მიანიშნებს, რომ COVID-19-ის რეინფექციის რისკი დაბალია ინფექციის შემდეგ რამდენიმე თვის მანძილზე, მაგრამ დროთა განმავლობაში რისკი შეიძლება გაიზარდოს იმუნიტეტის დაქვეითების გამო. საქართველოში დაყოვნების პერიოდი იმ პირებისათვის, რომელთაც ტესტირებით დაუდასტურდათ ინფექცია, განისაზღვრა 30 დღით.

ჯანმოს რეკომენდაციით დასაშვებია ორსულების და მეძუძური ქალების აცრა რისკისა და სარგებლის გათვალისწინებით.

საქართველოში COVID-19-ის ვაქცინების თანდართული ინსტრუქციის, ჯანმოს რეკომენდაციისა და არსებული მტკიცებულებების გათვალისწინებით, ორსულები და მეძუძური ქალები იცრებიან პფაიზერ ბიონტექის (Pfizer-BioNTech) და ოქსფორდ ასტრაზენეკას (Oxford/Astrazeneca) ვაქცინით.

ზოგადად, არსებული მტკიცებულებებისა და საერთაშორისო პრაქტიკის თანახმად, ვაქცინაციისათვის  წინასწარი  მედიკამენტოზური მომზადება (მაგალითად, წინასწარ  ანტიჰისტამინური ან რაიმე სხვა პრეპარატების მიღება) და არც სპეციალური გამოკვლევა საჭირო არ არის. თუმცა, გარკვეულ ინდივიდუალურ შემთხვევებში, კონსულტაციის შედეგად, გადაწყვეტილებას იღებს ექიმი.